شاعر: مرحوم استاد حاج علمدار ماهر (باکو 1950 - 2014)

السلام، ای هر ایکی دونیایه زینت فاطمه

السلام، ای گؤوهر دریای عصمت فاطمه

السلام، ای مصطفی­نین جسمی­نین بیر پاره­سی

السلام، ای حیدر کراره نسبت فاطمه

حق یولوندا صادق اولدون، صبر ائدیب هر محنته

ای آلان مین شؤوق ایله جامشهادت فاطمه

وئرمه­میشدی کیمسه اسرار وجودوندان خبر

ای وجود پاکی باشدان باشه حکمت فاطمه

سن لیاقت، سن نزاکت، سن صداقت رمزی­سن

ای نهال بوستان عزّ و غیرت فاطمه

کیم سنین تک اولدو اون­بیر اولیانین مادری

هانسی مادردیر قویان نسل امامت فاطمه

عید مولودون سعادت بخش ائدر، بیر لطف قیل

تا تاپاق بیز ده بو بایرامدا سعادت فاطمه

ای گلیب مولود زهرایه، عبادت­دن قاچان

سؤیله ائتمیشدیر هاچان دینه خیانت فاطمه؟

اجنبی­نین قویدوغو یولدان اوزاقلاش، ای باجیم

سیز قادینلارچون قویوبدور راه عفت قاطمه

دختر کبری حجابین الده محکم ساخلایین

اؤز حجابین سیزلره وئرمیش امانت فاطمه

زینب و کلثوم تک مردانه اول اسلامده

بلکه ائتسین آخرت گونده شفاعت فاطمه

بی­عمل­لردن کنیز اولماز خانیملار شاهینه

یاددا ساخلا ائیله­میش حقه عبادت فاطمه

ماهرم، چوخدور گناهیم، گر شفاعت ائتمه­سن

بیلمیرم حالیم نولور روز قیامت، فاطمه

منبع: «دنیز» نشریه سی، شماره 50 - تاریخ 31 فروردین 1393