اوروجلوق آیی
قوشار: اکبر حمیدی علیار
ای کؤنول غفلتده یاتما دورکی قالخماق واختی­دیر
جان قوشون معنا سماسیندا بوراخماق واختی­دیر
بیر اووشدور گؤزلرین قوی ییرتیلا اؤرتوکلری
وارلیغا، دونیایه آیدین گؤزله باخماق واختی­دیر
عیبی یوخ گر اشتباهلار، سهولر تونقاللاشیب
توبه آدلی کیبریتی تونقالدا چاخماق واختی­دیر
جان بویانمیش جوربه جور سولغون، یاراشماز رنگلره
حق بویاغین بو بویاقلار اوسته یاخماق واختی­دیر
دوم-دورو سو قالسا گر بیر یئرده بیرگون کیفله­نیر
دور چالیش، آختار، ایز آچ دریایه آخماق واختی­دیر
شوق ایله بیر سیلکه­لن، روحین ده قوی یونگوللشه
دارجا کؤهنه­لمیش قابیغدان ایندی چیخماق واختی­دیر
یول اینام، مرکب عمل، مین سورگونن قالما دالی
معرفت بایراغین ،اوغلان، عرشه تاخماق واختی­دیر
یاالله "علیار "واخت کئچر، گؤزله قاچیرما فرصتی
قاچ کی نور کروانی یوللاندی... قاریخماق واختی­دیر.
2/7/1386
http://golizadeh.parsiblog.com





برچسب ها : شعر ترکی  ,  ماه رمضان  ,  اروجلوق  ,