قوشار: علرضا ناعمی

آل باشیمی دیز اوستونه درد و بلاسی وار
الله بیلور نه حدّده غم و ابتلاسی وار

گون باتمامیش منیم باتاجاق عمرومون گونی
قیزلاریمون دیلینده بو گوندن نواسی وار

من چوخ چالیشدیم حقّوی دنیایه بیلدیرم
بو یولدا هر قضایه بتولین رضاسی وار

تا جان واریمدی ائتدیم حمایت امامیمه
یالقوز دگول علی بیله­لر جان­فداسی وار

بوندان علاوه ظلم و جفایه دؤزنمدیم
بو قومین آری کینة بی­ انتهاسی وار

امّت منیم دانیبدیلا قرب و مقامیمی
طاهانون هئچ دئموللـه کی خیرالنّساسی وار

مشکلدی گرچه آیریلیق اما نه چاره­ سی
احوالیمون عم­ اوغلی بئله اقتضاسی وار

یوخدور ایاقه دورماقا السّاعه طاقتیم
نه قلبیمون، نه دیزلریمون دای قواسی وار

چوخ سؤز واریم ولی سنه الان دئینمورم
داغلی اورکده حالت ستر و خفاسی وار

سربسته قوی دئیوم سنه زهرا قالان دگول
قورتارمیان ملالی ساغالماز یاراسی وار

جانیم یئتوب دوداقه بو زاری حلال ائله
روحیم آچوبدی پر داخی رحلت هواسی وار

مندن سورا حسن دیل آچار کشف راز ائدر
هر روضه­ سینده مین محن جان­گزاسی وار

تک قویما کوچیه چیخا آرتار مصیبتی
غم کوچه­ سینده خاطرة غم­ فزاسی وار

سعی ایله ثانی­نی حسنیم بیره گؤرمسون
شاید دؤزنمیه دل دردآشناسی وار

کلثوم اوشاقدی تئللرینه قویما تؤز قؤنا
بیلدیرمیون، هله بئله بیلسون آناسی وار

بو نئچّه گونده ابر بهاران کیمین دولوب
دیل آچسا گر گلاییه شیرین اداسی وار

گلموردی ساق الیم داریام نازلی ساچلارین
حسّاس قیزدی هر نیه گؤررم حواسی وار

من زینبه دویونجان آنالیق ائدنمدیم
اولسون، سنون کیمی ولی پرمهر آتاسی وار

قویما عروس اولاندا اونون گویلی غملنه
تای­توشلاری دئیلله کی طویدا عزاسی وار

امّا حسینیمی نئجه من تاپشیروم سنه
مظلوم حسینیمون بیلوسن کربلاسی وار

قویما عذاره گؤزیاشی­نی باغلیا حسین
او آغلاسا ملکلرین آه و بکاسی وار

سال یاوه منی بالامین حنجریندن اؤپ
فاش ائتمه زینبه ولی نه ماجراسی وار

زهرا فدادی گؤزلروه، آغلاما آقا
اود ویرما جان فاطمیه چوخ سپاسی وار

باخ کلُّ نفس ذائقةالموته ائتمه غم
باقی خدادی عالمین حکم فناسی وار

قوی اشکوی سیلوم اؤز الیملن اؤزوم سنون
بیر درس زینبه وئررم، انعکاسی وار

«گؤزیاشووی یارالاریما مرهم ایلرم
عالم بیلر کی هر یارانون بیر دواسی وار»

زهرا وصیّتین کیمه سندن سورا دئسون
نه مهربان آتاسی، نه­ده بیر اخاسی وار

گویلوم بودور کی گیزلدسن کفن و دفنیمی
دلدن بو امره دخت رسولین رضاسی وار

ساده دگول سنه، منه غسل ایلماق ولی
سندن عم­ اوغلی عم­ قیزوین التماسی وار

زحمت قبول ائله منه سن غسل وئر اؤزون
حشره کیمین دالونجا بتولین دعاسی وار

ییغ باشوه بالالاریمی قیل نمازیمی
زهرانون اؤزگه بوردا مگر آشناسی وار؟

قلبون داریخسا آغلا، ولی ناله ایلمه
چون کوه، صبروین بیلورم اعتلاسی وار

اهل مدینه، آغلاماقین خوشلاماز سسین
بو مردمون بو قدری بیلورسن وفاسی وار