«غدیر خم» بایرامینی بوتون ولایتمدار اینسانلار تبریک دئیهرک ایکی غدیریّه شعر، سیز اهلبیت عاشقرینه تقدیم ائدیرم.
بو شعرلرین ایکیسیده حؤرمتلی دوستوم جناب حجة الاسلام سید بشیر حسینی جنابلارینداندیر. بو عزیز شاعرایله تانیش اولماق ایچین بیر کیچک بیوگرافی آشاغیدا خدمتینزه تقدیم اولاجاق.
شاعر تانیتیمی
حجه الاسلام سید بشیر حسینی 1354 گونش ایلی «میانه» محالیندا یئرلهشن «طوق» کندینده آنادان اولموشدور. او ایلک و اورتا تحصیلاتینی اؤز دوغما وطنینده بیتیرندهن سونرا تبریزه گلیب و اورادا «حوزه علمیّه»یه داخل اولموشدور. ائله همن ایللرده ایدی کی شاعریمیز شعر یازماغا باشلادی. بیر نئچه ایلدن سونرا شاعریمیز «قم» مقدس شهرینه کؤچوب، تحصیلاتینی اورادا دوام ائتمیشدیر. بو شاعرین ایندییه کیمی شعرلری چوخلو محلی و رسمی درگی و جریدهلرده یاییلمیشدیر.
شاعرین بعضی چاپ اولان اثرلری:
1. زخم دل (تورکجه ــ فارسجا مدح و مرثیه شعر مجموعهسی)؛
2. شهزاده علی اصغر (فارسجا تحقیقی اثر)؛
3. زندگانی حضرت ابوالفضل العباس (فارسجا)؛
4. و ... .
حشره کیمین اونوتماروخ، عید غدیرى یا على!
حشره کیمین اونوتماروخ، عید غدیرى یا على!
سنسن ازلدن آخره خلقین امیرى یا على!
مهر و وفا سپهرینه گوندو رسول مصطفا
برج ولایتین سنن بدر منیرى یا على!
قلبیمه یازمیشام آدین گول کیمى ایلهرم مدام
نئیلییرهم بو دهریده مشک و عبیرى یا على!
عالِم علم غیبسن، چشمه هر علومسن
علم لدُنّیلن بیلهن سرّ ضمیرى یا على!
گویده دئییبدى جبرئیل: یوخدى على کیمین جوان
دهریده ذوالفقاریوون یوخدى نظیرى یا على! (1)
آدیوه روحیمیز فدا، شأنیوه جانیمیز فدا
حق سنه واگذار ائدیب امر خطیرى یا على!
ایلدى جانشین سنى امر حقیله مصطفا
آگه ائدیب بو نکتهیه خرد و کبیرى یا على !(2)
غاصب اولوبدى حقّیوه ییرمى بئش ایل لعینلر
غصب اولونوب خلافتین تخت و سریرى یا على!
اى گئجهلر یوزون قویان تپراقین اوسته آغلیان
جنگیده حىّ سرمدین غیضیلى شیرى یا على!
قاتلین ابن ملجمه ذرّه اذیّت ایتمهدین
ساخلیان احترامیلن ائوده اسیرى یا على!
اولسا لیاقتیم منیم دامنیوى بوراخمارام
سن بیل حسینوین جانى قؤوما «بشیر» یا على
***
1. اشاره‌دیر: «لافتى الا على لاسیف الّا ذوالفقار» جمله‌سینه.
2. اشاره‌دیر: «من کنت مولاه فهذا علىٌّ مولاه» حدیثینه.
ایکی پیمان
آلدى پیمان ایکى گونده خلقیدن ربّ قدیر
بیر گونون آدى «الست» و بیر گونون آدى «غدیر»
اولین گون سؤیلهدى آیا سیزین آللاهیزام؟
عرض ائدیب یکسر «بلى» مرد و زن و خرد و کبیر
ایککىمینجى گون آلیب پیمان ولایت عشقینه
تا بیلینسین خلقه کیمدیر حیدر اول شیر دلیر
امر ائدیب پیغمبره اعلان ائله بو مطلبى
تا غدیر خم چؤلینده داستان اولسون شهیر
گر بو نقشى ائتمهسن ایفا رسالت نقص اولار
چوخ اهمّیتلى ایشدور چوخ مهمّ و چوخ خطیر
یاخشى فرصتدیر بو گون اتمام اولوب حجّ وداع
حجّةالاسلامیده شرکت ائدیب خلق کثیر
ییغ هامى انصاریوى اصحابیوى سن بیر یئره
امر ائله اوردا قورولسون منبر و تخت و سریر
چیخ او منبر اوستونه چک مرتضانى یانیوه
آشکارا بلکه گؤرسینلر سیزى جمّ غفیر
ساغ الینله سول الین قووزا گؤیه یامصطفا!
من سنه ذرّ عالمینده حیدرى ائتدیم وزیر
سؤیله: اى مردم بیلین! آگاه اولون مندن سورا
هر کیمه مولا ایدیم من، بو على اولدى امیر
ائتدى اجرا امر حىّ داورى ختم رُسُل
گؤیلره دوتدو یوزون عرض ائتدى اول روشن ضمیر
دوشمنین دشمن علینون، دوْسلارین دوْست دوت خدا
مضمحل ائت دشمنین، احبابینه سن اول نصیر
خاضعانه دوردو صفده دوست و دشمن یکسره
ائتدیلر بیعت امیرالمؤمنینه بیر به بیر
اوّل و ثانى ازلده باغلییب پیمان، ولى
سیندریبلار عهدى اوّلده او مردان شریر
مرتضانى ائتدیلر ییرمى بئش ایل خانهنشین
قلبنى قان، حقّینى غصب ایلدى اهل سعیر
الغرض تا شیر حقّین منصبى اولدو بیان
چوخ حسود و منکرین قلبینه دگدى اوندا تیر
کین? دیرینهسین «حرث بن نعمان» ائتدى فاش
عرض ائدیبدى اى رسول بىعدیل و بىنظیر
سن بویوردون کى امیریزدى على مندن سورا
اؤز سؤزوندور یا کى امر خالق حىّ کبیر؟!
ائتدى فرمایش جوابینده رسول مصطفا
من اؤزوم یوخ، انتخاب ائتدى خداوند خبیر
قهریلن «حرث بن نعمان» سسلدى گر دؤزدو سؤز
یوللاسین آللاه منه گؤیدن عذابین ناگزیر
گلدى گویدن ناگهان بیر داش دوشوبدور باشینه
چیخدى جانى، یکسره دشمنلر اولدو سر به زیر
دهریده کیم منکر اولسا بو ولایت امرینه
حشریده اولماز اونا راه نجات و دستگیر
شیعه اثناعشر هیچ یئرده قالماز چارهسیز
شیر یزدان شاه مردان چون اولار یار و ظهیر
شیعهلر سندن بو گون بایراملیق ایستهر یاعلى
تهنیت عرض ائیلیهر عشّاقیوه «سیّد بشیر»
