محرم آیینین چاتماسینی بوتون شیعهلره تسلیت عرض ائدیرم.
محرم آیی، عشق آییدیر. بو آیدا عاشقلرین قانی جوشه گلر و عاشقلر اؤز ارادتلرینی «گؤزیاشلار شهیدی» و «سوسوز جان وئرن» مولالرینه گؤسترهرک کربلا شهیدلریایله پیمان باغالایارلار کی دین و اسلام یولوندا باش و جاندان کئچسینلر و امام حسینین یولونون دوام ائدنلریندن اولسونلار. آشاغیدا خدمتینیزه تقدیم اولان شعر حؤرمتلی مرثیه شاعری علیرضا حضرتی «حبیب»دن دیر. شاعر قوم شهرینده اولان تورک شاعرلردندی کی ایندییه کیمی ایکی شعر مجموعهسی اوندان چاپ اوزو گؤروبدور و اوچونجو مجموعهسی «نهضةالسادات» آدینی داشییر و ایندیسه چاپا حاضیرلانیبدیر. شاعریمز احساسلی و آخیجی یازان شاعرلردن حساب اولونور و شعرلری اوستون بیر درجهیه مالکدیر. بیرلیکده آشاغی شعری نمونه اولاراق اوخویورق:
حسین ئولمز
نوحه هلول ماه محرم و پیام ماه عزا به شیعیان
محرم گلدى محنتدن پریشانم حسین جانم
آخیر رخساره گؤزیاشیم نواخوانم حسین جانم
حسین جانم حسین جانم
جهاندا روح ایثارى ائدر احیا حسین عشقى
هر ایل بو آیدا دنیایه سالار غوغا حسین عشقى
حسین عاشقلرین یکسر ائدر شیدا حسین عشقى
هامى دیلده نوا سسلر حسین جانم حسین جانم
هر ایل بو آیدا عاشقلر قورار بزم عزا آغلار
حسینون بزم یاسینده تمام ماسوا آغلار
رسول مصطفى آغلار ، على المرتضى آغلار
آناسى سسلنر واى نور چشمانم حسین جانم
هر ایل بو آیدا عالملر اولار پوزغون عزاخانه
چکیلر هر یئره قاره گلر یئر گویلر افغانه
ملکلر عرشیده نوحه ائدر شاه شهیدانه
غمونده منده هر دم زار و نالانم حسین جانم
هر ایل بو آیدا عاشقلر ائدر ئوز عشقینى اظهار
شهادت مکتبینده درس ایثارى ائدر تکرار
حسینیم واى حسینیم واى دئییب باشه ویرار احرار
که یعنى پایبند عهد و پیمانم حسین جانم
حسینون انقلابى نهضت شور و تولاّدى
آلوب آزادهلر اول مقتدادن درس آزادى
حسیندور دهریده دانشگه حرّیّت استادى
بو دانشگهده همدرس شهیدانم حسین جانم
الا اى شیعهلر هوشیار اولون بو دار دنیاده
حسین ابن علىتک، اگمیون باش، ظلم و بیداده
کئچیب جاندان دئیون حقّى اولون اول شهتک
آزاده دئیون منده فداى دین و قرآنم حسین جانم
نچئیکى وار ئورکلرده صداقت شور و شین ئولمز
فنادور عالم امّا مست جام نشعتین ئولمز
ائدیب جانین فدا چون راه جاناندا حسین ئولمز
او جانه مرحبا اول عشقه قربانم حسین جانم
الا اى شیعهلر هر عصریده وار آل سفیانلار
ائدر هر مملکتده هر طرفده ظلم و طغیانلار
گرک راه ولایتده آخا تپراقلارا قانلار
وئریب باش سویله من دینه نگهبانم حسین جانم
حسینى ظهر عاشوراده چونکه سالدیلار آتدان
بدن باشدان باشا پیکان، ئورک داغلى، دوداق عطشان
خلوصه باخ دیلى مشغول ذکر حضرت سبحان
بو اخلاصه بو شور و حاله حیرانم حسین جانم
دئدى یا رب بویاندیم قانه قرآن مبین قالسین
جهاندا حشرهجن آئین ختم المرسلین قالسین
تشیّع اولماسین فانى، فنا دنیاده، دین قالسین
که من جانباز راه عشق و ایمانم حسین جانم
